رواية : ( تمنت ان تصبح ذكر فأًصبحت !!! ) - الصفحة 3 - منتديات غلا روحي
قديم منذ /10-09-2012, 02:51 PM   #15

wdaad


 

wdaad غير متصل

  info عُضويتيّ arrow 17664
  info تسجيليّ arrow Sep 2012
  info مُشآركاتيّ arrow 12
  info حلالي arrow 0
  info قوة عطآئي arrow wdaad is just really nice
  info نقآطيّ arrow 0
Female

 
افتراضي رد: رواية : ( تمنت ان تصبح ذكر فأًصبحت !!! )




بسم الله الرحمن الرحيم
السلام عليكم ورحمة الله وبركاته

اتمنى تنال اعجابكم وتحــوز رضــاكم

البـــــارت العاشــر ....

يرن جوال ليال ....

ترد ليال : الوو

محمد : ابشرك قام نايف بسلامة تعال زوره ولا اقول الحين انا بجيك نزورة

ليال : لا اعذرني انا مشغول بشوفه في وقت ثاني

محمد متفاجئ : انت كل يوم تزورة وتجلس اكثر من ثلاث ساعات والحين ماتبي تزورة ؟ !!

ليال : انا مرة مشغول صدقني مااقدر ازورة اليوم بزورة في وقت ثاني

محمد : براحتك اشوفك بكرة على خير

ليال : ايه ان شاء الله (تسكر الجوال )

محمد حديث نفس : اتوقع انها تكذب لو ماكان تعرف انه قام بسلامة كان ماطلعت صوت حزين شكله صار شيء بينه وبينها شكلها كانت تعرف قبلي وقبلهم انا مادري عنها يمكن انها صادقه ويمكن تكذب ....

في البيت .....في غرفة ليال ...


ليال حديث نفس : انا ماعرف وش اسوي الحين احس بالخسارة اذا تركت نايف واحس بالقهر اذا رجعت له بس انا راح ارجع له وأساله ليش طردني ؟ وش السبب ؟ وش سويت ؟ صح انه جرحني بس يمكن غلطت عليه بدون مااحس (تحاول تذكر شيء غلطت بحقه ) اذكر اني لبست تي شرت حقه وماعرفت انه حقه بسبب محمد بس معقوله زعلان بسبب هذا لالالا طيب يمكن اني ماكنت معه كثير كنت مع شله فهد لالالا مااتوقع طيب وش السبب ؟ اخ لازم اروح اساله بس مو اليوم ولا بكرة اخ....... اجل متى اسأله لحد الحين مرتبكة انا راح اسأله لما......احس اني مو مرتبكة .
في الصباح في المدرسة في وقت الأستراحــه......

كانت مع شلة فهد وكانوا يسولفون ويستهبلون وليال سرحانه تناظر السماء وفي يدها عصير برتقال ...

ليال حديث نفس : يوم سألتني جمانه وقالت ترضين تــتزوجين بنت ؟ كنت في هاذي اللحظة متعجبه لأني ابدا مافكرت من هاذي الجهة ماكنت ابدا افكر بشيء عن امور حياتي المستقبليه (تتنهد) كل اللي كنت افكر فيه اني راح اكون اكثر سعادة في حياتي لو صرت ولد واني راح احقق حلم ابوي انه يكون عنده ولد بس ..انا .... راح اتضرر كثير بالأخير . _تناظر عاصم ومحمد وعبد العزيز ) تركت صديقاتي فجأة بدون وداع اتوقع انهم يذكروني مانسوني (تبتسم ) .

محمد : ياهووو يافاهي ياهوو

تلتفت ليال لمحمد وتناظره ...

ليال : هلا

محمد يناظر ليال ولون شعرها على ضوء الشمس ولمعان عيونها وبراءة نظراتها الا الهواء يهب ومحمد ساكت يناظر ليال بأعجاب شديد ....

محمد حديث نفس : احس عيوني ماتقدر تبعد عنها من رغم أني اشوف كثير من بنات عماني وبنات خوالي بس محد عجبني كثر هاذي البنت لأني اشوف لها جمال مختلف ياليت ماتصير ولد ياليت ما عرف وليد انها بنت ياليت ...

ليال : هي وش فيك الحين تناديني بالفاهي ولا شفت نفسك

محمد ينقهر من كلام ليال

محمد : انا رايح اشتري شيء اكله

ليال : توك ماكل قبل شوي !

يقوم ....
محمد : وش دخلك

ليال : !!

محمد راح يشتري

عبد العزيز : تكلم عصوم قول شيء ليش ساكت

عاصم وهو يناظر في البي البي : لا بس مشغول شوي

عبد العزيز: ههههاي مشغول مع البنات لو بنت تشوف وجهك مارح تقدر تنام

عاصم : ادري اني مزيون

عبد العزيز : ههههههه واثق ماشاء الله عليك

عاصم : هههههههه اكيد

فهد : هههههههههاي تذكرون البنت اللي عطيتها رقمي

عبد العزيز : ايه وش فيها ؟.

فهد : غابت اليوم وتقول غبت علشانك

ليال : اما

فهد : والله

ليال : ابي اشوف عطني جوالك

تاخذ ليال جوال فهد وتفتح البي بي وتقرأ

ليال ترفع صوته : حبيبي !! تقول حبيبي توك متعرفه عليه امس خلاص صرتوا حبايب علطول !

فهد ياخذ الجوال من ليال ....

ليال : هي عطني اكمل ابي اقرأ الباقي

فهد : هههههه مارح اعطيك بعطيك وحدة تكلمها صبر لحظة (يناظر جواله )

ليال : لالالالالا مابي مابي مابي

فهد : ! ؟ ليش ؟

ليال : لأني ...لأني حديث نفس : ياليل ورطة وش اقول له

فهد : لأنك ايش ؟

ليال : ايه مرتبط بكم بنت

فهد يقوم ويقرب من ليال ويدخل يده بجيب ليال ويطلع جوالها

ليال : رجعه رجع جوالي

تحاول ليال تاخذ جوالها من فهد وفهد يفتح جوالها ويدخل على الأرقام ويناظر الأرقام وليال تحاول تاخذ الجوال منه

فهد : عندك سمر حلوو وعندك جمانه حلوو اسمائهم ولا بعد عندك رولا

ليال عصبت وسحبت الجوال من فهد بقوة ونزلت راسها

ليال : لا تصير ملقوف مثل محمد

فهد : ؟

محمد يشوفها وهي تقول هذا الكلام

محمد : وش تقصد ؟

ليال : انا رايح ارتاح بالفصل

محمد يرفع صوته : وش تقصد ؟

ليال تكمل مشي وراحت الفصل

فهد حديث نفس : غريب

محمد حديث نفس : وش كانت تقصد ؟

عاصم : لاتروح عند عبود خله بيرجع صدقني

محمد : من قالك بروح له

عبد العزيز : انا جيعان عطني الفطيرة اللي معك محمد

محمد يعطي عبد العزيز الفطيرة

محمد : خذ

عبد العزيز : تسلم

في الفصـــل ....

ليال جالسه بكرسي وحاطه راسها بطاوله ومغمضه عيونها

ليال حديث نفس : غبي ملقوف شاف كل الموجود بجوالي شكله بيشك فيني يكفي عندي واحد ملقوف مثل محمد

يدخل وليـــد .....

وليد : انت موجود هنا عبود !!

ليال حديث نفس : ياليل وش جابه ) ايه

وليد : ليش انت مو معهم كالعاده

ليال حديث نفس : وش يبي ) لأني حسيت بتعب شوي وحبيت ارتاح في مكان مافيه احد

يجي وليد عند ليال ويجلس بالكرسي اللي جنب ليال ...الأ تفز ليال وتبتعد شوي

وليد : أيـــــه

ليال : معك ساعه وليد

وليد : ايه صبر اشوف كم الساعه

يرفع كمه ويشوف الساعه

وليد : بقى ربع ساعه ويخلص وقت الأستراحه

ليال : لا ياغبي ابي اعرف كم ساعه

وليد : اعذريني قلبي الساعه الحين تسع وخمس واربعين دقيقه

ليال : لاتقول قلبي ولا أي كلام غزل لاتفكر لأنك عرفت اني بنت تتساهل معي

يدخل جاسم .. .

شخصيه جاسم : جاسم صديق عزيز لوليد وهو مسالم مابينه عداوة ابدا ومايدري ابدا بأمر ليال وشكله عيونه بنيه من ناحيه طول طوله متوسط وجماله متوسط

ـــــــــــــــــــــــــــــــــــــــــ

جاسم : يالله نطلع وليد

وليد : يالله

يقوم وليد ويناظر ليال

وليد : اشوفك على خير عبودي

ليال حديث نفس : انقلع روحه بلا رجعه ) الله معك

يطلع وليد مع جاسم ويسكر الباب وليد ومافي في الفصل غير ليال

ليال حديث نفس : انا ماارتحت له (تحط راسه بطاوله ) ولا يقول ياقلبي قوي عين بس طريقة كلامه محترمة !

وبعد الفسحه الحصه السابعه ماقبل الأخيرة وكان هجوود الفصل وكان استاذ الفيزياء يشرح الأ يدخل فجـــأة نايف ... وتعجب الفصل كله ويجي نايف عند ليال ويسحبها بيدها

نايف : استاذ راح اخذ معي عبد الله صار شيء ولازم يروح معي

استاذ الفيزياء :!!!

يمشي نايف وهو ساحب ليال ويطلع برا الفصل

استاذ الفيزياء : اذا كان بهاذي الضرورة ممكن بس هاذي المرة

وهو ساحب ليال وماسك يدها ويمشي مسرع

ليال : جيت المدرسه ؟ !!! ماكنت متوقعه بتجي وليش مسرع وش السالفه وساحبني معك صار شيء ؟؟

نايف : مو هنا بنتكلم..... نتكلم بسيارة

ليال تسحب يدها وترجع شوي ...

ليال : أنا ماأقدر اروح معك

نايف يمسك اعصابه ...

نايف : انا طلعت من مستشفى وركبت السيارة مسرع هنا علشان اخذك واكلمك بموضوع مهم وانت تظن اني جاي هنا اخذك تسليه ؟

ليال تبلع ريقها : انا ادري انك ماجيت هنا تاخذني تسليه بس انا مااقدر اروح معك اعذرني

نايف يسحب ليال بقوة وفي برا المدرسه يفتح باب السيارة ويدخل ليال ويسكر الباب بقوة ثم يركب ويقفل السيارة ويشغل السيارة

نايف : ليش تكذب أو بالأحرى تكذبين ليش ؟

ليال حديث نفس : عرف اني بنت !!! ) ها

نايف : انتي ماتبرعتي لي تبرع لي فهد

ليال : من علمك انه تبرع لك فهد ؟

نايف : شيء مايخصك ليش ماعلمتيني ؟.

ليال : انا مارح اجاوبك لما تعلمني من قالك ؟

نايف : الدكتور رفض يقول لي وبعدها بفترة شفت الدكتور ترك مكتبه لأنه عنده حاله طارئة فدخلت وخذيت ملفي وشفت اسم المتبرع ومتى تبرع لي ومكتوب بعد التاريخ واليوم ليش تكذبين علي

ليال : وانت ليش تكلمني بالكنه بنت وليش يوم قلت لك اني تبرعت لك ماصدقتني

نايف يلتفت على ليال : لأن مستحيل بنت تتبرع بدم

ليال تناظر بتعجب وبتوتر تقول كــ كـ كيف تعرف اني بنت

نايف : في يوم الاستراحه ماكنت موجود كنت رايح لمدرسة مثل ماطلب ابوي اجيب عمال يصلحون المكيفات واشياء ثانيه ودخلت مكتب المدير وهو ابو محمد لأنه طلب مني اخذ ملف طالب يبي ينتقل واعطيه اياه وانا ادور بالملفات شفت ملفين لك استغربت وفتحته وشفت اشياء عاديه بالملف الاول والثاني كان ملفك الاصلي وهو انك بنت ولمدارس اللي درستي فيها تعجبت كثير وعرفت انك بنت وكنت منصدم وكانت في كثير اسأله في بالي وبعدها رجعت للأستراحه وكأن مافي شيء لأني ماكنت مصدق او مستوعب وانا في سيارة واسوق جلست افكر فيك انت بنت ولا ولد إلا صار لي حادث حتى اني ماكنت ادري ان صار لي حادث

ليال ودموع مليانه عيونها : طلبتك طلبتك نايف استر علي ولاتفضحني طلبتك

نايف يناظر بتعجب شديد ....

ليال : انا اسفه ماقدرت اقولك اللي تبرع لك فهد لأن فهد قال لي لاتعلم احد وحتى نايف وكنت مؤتمنة اني مااقول لأي احد فأضطريت اكذب انا اسفه نايف ......اسفه

نايف : انتي ليش دخلتي مدرسة عيال ؟

ليال : لأني بصير ولد وقررت لأن صار لي تعادل بالهرمونات الأنثويه وذكورية

نايف : وانتي تظنين انه شيء سهل تصيرين ولد ؟

ليال : ماادري

نايف : انتي وحدة غبيه تبي تصير ولد برغبات غبيه

ليال : انا مو رغباتي غبيه انت حتى اصلا ماتعرف ليش ابي اصير ولد

نايف : تبين تسوقين سيارة انا مستعد ادفع لك فلوس ونسافر دبي او أي بلد تبين وتسوقين تبين تغازلين فيك شذوذ ؟ ولا تبين شغل مثل الرجال ولا تبين يكونون حولك عيال

ليال ترفع صوتها : ولا واحد منهم انت ماتعرف اصلا ليش بغيت اصير ولد ومالك دخل فيني ابدا لا تدخل

نايف : كيف مااتدخل وفي بنت في مدرسة عيال ؟

ليال : بس لاتدخل يكفي كلام رجعني للمدرسة الحين

نايف : مارح ارجعك لمدرسه قولي سبب مبرر ارجعك

ليال تنقهر من نايف
ليال : نزلني الحين

نايف : مارح انزلك لما تقولين السبب

ليال ترفع صوتها : خلني انزل من سيارة

يوقف نايف السيارة في مكان بعيد عن سيارات ويلتفت على ليال

نايف : قولي وش السبب اللي يخليك تصيري ولد ؟

ليال بصوت حزين : كانت رغبتي اكون ولد يوم فكرت اتراجع شفت ابوي فرحان ومتفائل بالخير وهونت اقول له وانا احاول اتأقلم مع وضعي وانت تزيد علي ضغط اكثر

نايف : ليش ابوك مايتزوج خليه يتزوج وجيب ولد ان شاء الله وارجعي على اصلك بنت

ليال : ابوي عقيب بسبب حادث صار له جلس حوالي شهر كئيب وماعنده غيري انا واختي من ابوي ثم رجع على طبيعته والحمدلله

نايف : ابوك كم عنده زوجة ؟

ليال : ثنتين امي وزوجته الأولى بس امي توفت ومابقى غير زوجته الأولى بس زوجته الأولى ماجابت اختي بسهوله جلست ثلاث سنوات ثم حملت فيها بعد محاولات وعلاجات انها تحمل وبعدها اقترحت عليه واصرت عليه يتزوج وحده ثانيه يجيب منها ولد وبعدها تزوج امي وجابت امي بنت وهو انا ثم بعدها ابوي ماكان يزورني الآ نادرا وامي كانت تعصب ويجلسون يتهاوشون مني بعدها ابوي بعدة ايام صار له الحادث وصار عقيم ومن القهر ابوي طلق امي وبعدها جلست امي تحس بذنب والقهر وكانت تحبه مرة فقررت تحمل علشان ابوي يمكن يرجع لها اذا حملت بولد وسوت بواسطة علاج يلقح البويضات ويخليها تحمل وبعدها بأيام كان عندها موعد بالمستشفى وراحت جدتي تصحيها الأ شافتها ماتت وانا يوم صار يمديني اغير نفسي من بنت الى ولد فرحت وقررت ابي اكون ولد بعدها يوم قررت اهون تذكرت ابوي ان يمكن احقق حلم ابوي هذا كان كل تفكيري بعدها لا أكثر ...

نايف يناظر ليال بحزن وقهر من نفسه وبصوت حزين يقول : انا اسف

ليال تناظر بتعجب لنايف وتبتسم ابتسامه هادئه
في المدرسه .... في الفصل

محمد : وش تتوقعون يبي نايف من عبود ؟

عبد العزيز : ماادري

عاصم : مالي دخل فيهم وحتى انتم مالكم دخل ليش تتلقفون وتفكرون بعد

فهد حديث نفس : وش كان يبغى من عبود لايكون عرف ؟ انا خايف انه عرف وبعدين راح تبدأمشاكل جديدة معه

محمد : تتوقعون بيرجع ولالا

عاصم : ياخي مارح يرجع بالله تخيل احد خذاك من المدرسه بترجع للمدرسه

محمد : اكيد لا بس ...

عاصم : لاتكثر كلام

وبعد مرور نص ساعه ...

في مطعــــم راقــــي ...

ليال : ليش تعبت نفسك وعزمتني على مطعم كان رجعتني ورجعت ترتاح ببيتك

نايف : لا تخافين انا مارح اسوي لك شيء بس هذا اعتذار مني لك وياليت تقبلينه

ليال : انا ماافكر حتى اخاف منك بس كان ماتعبت نفسك توك طالع من مستشفى

نايف : لا تعبين نفسك بهذا الكلام بس هذا اعتذار مني من اخ لأختــه او بالأحرى اخوه (يبتسم )

ليال تنصدم من ابتسامه نايف له ليال حديث نفس : ا...ا بتسامته تخلي قلبي مايوقف عن النبض بقوة ...

نايف : ليال

ليال : هلا

نايف : كيف اناديك الحين ؟بالكنه بنت ولا ولد

ليال : بالكنه بنت لأن توني بس قدام الناس لكنه ولد

نايف : ايه طيب في احد يعرف غيري

ليال حديث نفس : محمد الملقوووف ووليد المريض

نايف : انا اعرف واحد عرف انك بنت

ليال تنصدم : من هــو

نايف : وليــد

ليال : ادري حتى هو قال انه يعرف اني بنت

نايف : سوى لك شيء ؟

ليال : لا والحمدلله ولا هددني والحمدلله بس قال انه راح يستر علي

نايف : يستر عليك !!

ليال : أيــه

نايف يناظر ليال حديث نفس : ماتدري ان هذا وراه مصايب ذا وليد لا زم انتبه لها ولازم ابتعد عنها لأنه عرف اني اعزها اخاف يسوي لها شيء يوم زارني في المستشفى جاب ورد اصفر وابيض ويبتسم لي وكان ابوه معه بس انا ابدا مارتحت له لأنه قال لي من قبل يكرهني اكثر من أي شخص فكيف يبتسم ويجيب ورود لايكون عشان ابوه ! ياليت خذيت الملف معي ولا تركته مفتوح من الصدمه اخ (يحط يده براسه )

ليال : نايف في شخص ثاني يعرف غيرك بعد
نايف يبعد يده عن راسه ويلتفت لها وفي علامات وجهه كأن يقول من هو؟

ليال : محمد عرف اني بنت

نايف : كيف .؟

ليال : يوم كنت بالأستراحه باليل قال محمد يبي يكلمني بموضوع وكنت بعيده عن الكل فسألني اني بنت ولا لا وبعدها تاكد اني بنت لأني توترت بعدين اعترفت بس مااعرف كيف عرف بس اتوقع كان وقت الفجر بس كذبت عليه قلت امي زوجه الأولى مو الثانيه لأن امي زوجته الثانيه لاني بحس بالقهر اذا جلس يقول زوجته الثانيه بتعجب

نايف : ايه بس انتبهي على نفسك

ليال : اكيد ان شاء الله

نايف : وهو يناظر ليال بحزن حديث نفس : زاد خوفي عليها اكثر مأبي يصير لها شيء لأني ابدا ماارضى على اختي اذا مسها مكروه ابدا ماارضى طردتها في ذاك اليوم لأني شفت احد يتجسس علينا وهو وليد ماحبيت يسمع شيء بس اتوقع عرف اني مهتم فيها كثير اخاف يمسها بمكروه واذا مسها شيء مارح اسامح نفسي ابدا والله مارح اسامح نفسي اذا صار لها شيء ...

يجي النادل ويحط الأكـــل ويصب عصير برتقال باليمون وكان كاس فيه ثلج وليمون زينه وكان الأكل ورق عنب بشكل جميل ومرتب وفي بعض المقبلات وغيرها من اكل

ليال حديث نفس : ذابحني الجوع اخ بطني ...

نايف : يالله سمي واكلي

ليال : مشكور على الغداء بسم الله

نايف : العفو ماسويت غير الواجب

ليال ينبض قلبها بقوة وتقبض يدها تحت الطاوله ...

في سيارة فهد وشله ...
عبد العزيز : شباب في مطعم مزيون وصح انه غالي بس راح يرخصون السعر

محمد : ليش يرخصون السعر ؟ !

عبد العزيز : لأنه هذا المطعم صاحبه نايف

محمد عاصم منصدمين

فهــد : لا مابي اروح له نروح بوفيه احسن

محمد : لا تكفى لا تكفى خلنا نروح لمطعم يالله

عاصم : هي يهمكم راي فهد خلاص نروح له

عبد العزيز : يعني تغيير ملينا من بوفيات

محمد : انت ماتمل من أي بوفيه بس قول تبي تعرف عن الأكلات ثانيه جديدة

عبد العزيز : هههههههه انت تعرفني زين يالبى قلبك

محمد : ههههههههه

عاصم : خلاص فهد خلنا نروح لمطعم

فهــد : خلاص نتوكل على الله ونروح المطعم بس هاذي المرة

وبعد الوصول لمطعم ... دخلوا المطعم وحجزوا مكان وهم رايحين يجلسون بمكان اللي حجزوه مرو على طاوله موجود فيها ليال ونايف ومحد لاحظهم غير فهد

فهد حديث نفس : عبود ونايف !!! ولا فالينها بعد ...

محمد : يالله فهد تعال اجلس هنا

فهد : جاي الحين (يجلس )

ليال تناظر حديث نفس : كني شفت فهد ؟

ــــــــــــــــــــــــــــــــــــــــــــــــــ ــــــــــــــــــــــ

من تـــــأليف : وداد

البارت الجاي ان شاء الله يوم السبت تاريخ 27 \11\1433هـــ





  رد مع اقتباس
قديم منذ /04-09-2018, 12:21 AM   #16

هيا الحمدان
~[ سفير غلا روحي ]~


 

هيا الحمدان غير متصل

  info عُضويتيّ arrow 22326
  info تسجيليّ arrow Apr 2018
  info مَلآذيّ arrow كُوب قهوة وكتآب
  info مُشآركاتيّ arrow 5,921
  info حلالي arrow 35
  info قوة عطآئي arrow هيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to beholdهيا الحمدان is a splendid one to behold
  info نقآطيّ arrow 0
Female SaudiArabia

 
افتراضي رد: رواية : ( تمنت ان تصبح ذكر فأًصبحت !!! )




يعطيك العافيه




  رد مع اقتباس
إضافة رد

الكلمات الدلالية (Tags)
!!!, (, ), :, ان, ذكر, تموت, تصبح, رواية, فأًصبحت


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
ليتك تموت اليوم وارتاح انا منك وشہلون مہغليكہ || بوح القصيد والشعر.. 8 07-29-2011 07:16 PM
ليتك تموت اليوم وارتاح انا منك نص الدنيا || بوح القصيد والشعر.. 8 12-23-2010 06:01 PM


توقيتُنا الآن , يُشير - إلىْ 12:32 PM


Powered by vBulletin® Copyright ©2000 - 2018, vBulletin Solutions, Inc.
بـِ سَرقتُكَ لـ الحُقُوق ، أَنت تُقلّدُنَا وِسَامَ التّمَيّز وَ الانفراد بـ المميّز
أقلام و إبداعات أعضائنا هي ملكٌ لهم فقط ،تعبّر عنهم فقط ..
مجتمع و منتديات غلا روحي ® أقلام شكسبيرية وريشة دافنشيه